Den gamle skikongen var henta inn som føredragshaldar under Naturfestivalen som blei arrangert i Ørsta førre veke.

Då namnet hans dukka opp på startlistene til det spektakulære motbakkeløpet Saudhornet Rett Opp to dagar etter, trudde mange Brå skulle stille til start i konkurranseklassa. Men 63-åringen tok heller turen opp på førehand saman med kona.

Skulle ha hengt med teten
– Det er alt for bratt for meg å springe opp her. Den tida er eg ferdig med. Eg er klart best på flatt underlag, smiler Brå som fortel at han framleis held seg i god form.

– Prøvar å halde meg i grei form. Eg spring vel ti kilometer på 40 minutt pluss.

Ein absolutt respektabel tid for mannen med to VM-gull, to OL-sølv, tre samanlagtsigrar i verdscupen og 16 NM-gull.

No om dagen brukar mange langrennsløparar motbakkeløp som konkurransetrening om sommaren. Det var ikkje tilfelle då Oddvar Brå var aktiv.

– Det var ikkje mykje slike løp som gjekk til topps på fjell, men det var fleire fjelløp. Dei løpa gjekk ofte høgt og i meir variert terreng, seier han medan Saudehornet på 1303 meter ruvar i bakgrunnen.

– Korleis hadde du hevda deg opp dit i dine glansdagar? spør me og peikar oppover.

– He he, dei beste i dag er ein del lettare enn det eg var – men eg burde nok ha vore med teten i dag.

Med teten denne dagen tenkjer han på eritreiske Tomas Bereket som vann det 5,6 kilometer lange løpet på tida 53,06 og kombinertløpar Ole Martin Storlien på andreplass med tida 56,36.

Spesiell tidsepoke
Under føredraget torsdag kveld fekk publikum i Ørsta høyre om Brå sin lange karriere i langrennssporet frå slutten av 60-talet til starten av 90-talet. Der er det mykje å ta av.

– Ein ting er at han var lang. Men det er inga tidsepoke det har skjedd så mykje. Eg var med på utviklinga frå treski til glassfiber, klassisk til skøyting og enkeltstart til fellesstart blant anna. Det er mykje å fortelje om.

Dagane i fjella på Vestlandet var han også godt fornøgd med.

– Me har hatt fine dagar her i Ørsta. Saudehornet var eit fint fjell og me fekk også med oss Besseggen på veg hit på onsdag. Der var det 30 år eg hadde gått, fortel skilegenda frå Hølonda.